මාස 2ක බිළිඳෙකුට කිරි හිරවීම නිසා රෝහලට රැගෙන ඒමෙන් පසු අදාළ රෝහල බිළිඳාව භාර නොගැනීම හේතුවෙන් වෙනත් රෝහලකට රැගෙන යන අතරතුර බිළිඳා මියයෑමේ සිද්ධියක් වාර්තා විය.
මාතර දිස්ත්‍රික් නව රෝහලට රැගෙන ආ බිළිඳාව එලෙස භාරගෙන නොතිබුණු බව වාර්තා වන අතර මෙලෙස ජීවිතක්ෂයට පත්වී ඇත්තේ මාතර කඹුරුගමුව ප‍්‍රදේශයේ පදිංචි ඔසඳ ආකිෂ් නමැති මාස 2යි දින 27ක් වයසැති නිවුන් දරුවන් දෙදෙනාගේ වැඩිමහල් බිළිඳාය.
03 අලුයම් කාලයේදී මෙම දරුවාට කිරි ලබාදී ඇති අතර එහිදී කිරි සිරවීමක් සිදුවී ඇති අතර දෙමව්පියන් විසින් ත්‍රීරෝද රථයකින් බිළිඳාව වහාම මාතර කොටවිල ප‍්‍රදේශයේ පිහිටා ඇති මාතර දිස්ත්‍රික් නව රෝහල වෙත රැගෙන ගොස් තිබුණි.
මව්පියන් පවසන පරිදි, එහිදී ආරක්ෂක නිලධාරීන් පවසා ඇත්තේ රෝගියා භාර ගැනීමට නොහැකි බවත් ඒ මොහොතේ හදිසි ප‍්‍රතිකාර ඒකකය ක්‍රියාත්මක නොවන බවත් ය.
පසුව ගිලන් රථයකින් හෝ වෙනත් රෝහලක් වෙත දරුවා රැගෙන යාම සඳහා රෝහලට ඇතුළුවීමට ඉඩ දෙන ලෙස දෙමව්පියන් පවසා ඇති අතර එයද රෝහල් ආරක්ෂක අංශය වළක්වා තිබෙනවා.
පසුව ඔවුන් කිලෝමීටර් 10ක් පමණ දුර ගෙවා මාතර මහ රෝහල වෙත බිළිඳා රැගෙන ගොස් ඇති අතර ඒ වනවිට බිළිඳා ජීවිතක්ෂයට පත්වී ඇති බව වෛද්‍යවරුන් පවසා ඇත්තේ විනාඩි 30ට පමණ පෙර රැගෙන ආවේ නම් බිළිඳාගේ ජීවිතය බේරාගැනීමට තිබූ බවය.
බිළිඳාගේ දේහය පිළිබඳ අවසන් කටයුතු ඊයේ සවස මාතර පොදු සුසාන භූමියේදී සිදුකෙරුණු අතර මරණ පරීක්ෂණ වාර්තාවේ සඳහන්වී ඇත්තේ මෙය කිරි සිරවීමෙන් සිදුවු මරණයක් බවය.
