ජනාධිපතිවරයා විසින් කොරෝනා ආසාදනය වී මිය යන මුස්ලිම් ජාතිකයන්ගේ මෘතදේහ භූමදාන කිරීමට අවසර දී ඇති බවට තවුහිද් ජමාඅත් සංවිධානය විසින් නිකුත් කර තිබෙන නිවේදනය ගැන පරීක්‍ෂණයක් ආරම්භ කරන ලෙස ජනාධිපතිවරයා විසින් පොලිස්පතිවරයාට උපදෙස් දී තිබේ.

ඊට අදාළ පැමිණිල්ල තමා ජනාධිපතිතුමාට යොමු කළ බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ප්‍රේමනාත් සී දොලවත්ත සඳහන් කරයි.

මුස්ලිම් ජාතිකයන් කොරෝනා ආසාදනය වී මිය ගියහොත් එම දේහයන් භූමදානය කිරීමට අවසර දී තිබෙන බව සඳහන් කරමින් තවුහිත් ජමාත් සංවිධාන නිකුත් කර ඇති මාධ්‍ය නිවේදනය ගැන තමන් විමසූ බවත් එවැනි අවසරයක් මේ දක්වා ලබාදී නැති බවත් ජනාධිපති ගෝඨාභය රාජපක්ෂ මහතා පැවසූ බවත් මන්ත්‍රීවරයා පැවසීය.

කොරෝනා ආසාදිතයන් මිය ගිය පසු එම දේහයන් ආදාහනය කිරීමට උපදෙස් දී ඇත්තේ සෞඛ්‍ය බලධාරීන් බවත් ඒ සම්බන්ධයෙන් විශේෂ කමිටුවක් අධ්‍යනය කරමින් සිටින බවත් ජනාධිපතිතුමා ප්‍රකාශ කළ බවද ඔහු සඳහන් කළේය.

කොරෝනා ආසාදිත පුද්ගලයන් මියගිය පසු දේහයන් භූමදානය කිරීමට කැබිනට් මණ්ඩලයේ ද අනුමැතියක් හිමිව නැති බවද දොලවත්ත මහතා පැවසීය.

තමන් මේ පවසන්නේ ජාතිවාදී ආගම්වාදී ප්‍රශ්නයක් නොව සියලු ජාතීන්ගේ සෞඛ්‍ය ආරක්ෂාව වෙනුවෙන් බවත් මන්ත්‍රීවරයා කියා සිටියේය.

LEAVE A REPLY

Please enter your comment!
Please enter your name here