“ගෙදරින් නැටුමට සංගීතයට ඉඩ නැති නිසා ගෙදරින් ගියා, මුද්දක් විකුණලා සල්ලි ගත්තා” – කෙසෙල්වත්තේ දැරියන් කියන කතාව…

කෙසෙල්වත්ත ප්‍රදේශයේදී අතුරුදන් වූ වයස අවුරුදු 13ක් හා 15ක් වන දැරියන් තිදෙනා නිවසෙන් පැනගොස් තිබුණේ සංගීතය හා බටහිර නර්තනය පුහුණුවීමට සුදුසු ස්ථානයක් සොයා බව පොලිසිය විසින් සිදුකරන ලද විමර්ශන වලදී කරුණු අනාවරණයක් වී තිබෙනවා.

සංගීතයට හා බටහිර නර්තනයට දැඩි ඇල්මක් දැක්වූ තමන්ට මව්පියන්ගෙන් එල්ල වූ දැඩි විරෝධය හමුවේ ඔවුන් එලෙස කළ බවයි එම දැරියන් තිදෙනා පොලිසිය වෙත ප්‍රකාශයක් සිදුකරමින් පවසා ඇත්තේ .

කොළඹ කෙසෙල්වත්ත, මාටිස් පටුමගේ පදිංචි මව, පියා සහ දැරියන් දෙදෙනෙක් ජීවත්වන නිවසට ගම්පොළ ජීවත් වන මවගේ නැගණිය සහ ඇයගේ දියණිය මීට සතියකට පමණ පෙර පැමිණ තිබෙනවා.

නමුත් පසුගිය 08 වනදා රාත්‍රියේ 13 සහ 15 හැවිරිදි වියේ පසුවූ දැරියන් තිදෙනා සහ තම ජංගම දුරකථනය අතුරුදන් බවට කෙසෙල්වත්ත නිවසේ පදිංචි දැරියන්ගේ මව කෙසෙල්වත්ත පොලිසියට පැමිණිල්ලක් කරනු ලැබුවා.

ඇය එහිදී සඳහන් කර ඇත්තේ, 08 වනදා පෙරවරු 7.45ට පමණ දැරියන් තිදෙනා කාමරයේ සිටියත්, 8.30 පමණ වන විට ඔවුන් දක්නට නොසිටි බවයි.

සී.සී.ටී.වී. දර්ශන ඔස්සේ විමර්ශන සිදුකළ පොලිසියට දැරියන් ගමන් බෑග් 3ක් ද රැගෙන නිවස පිහිටි පටුමගේ ගමන් කරන ආකාරය සොයාගැනීමට හැකිවිය.

සිද්ධිය සම්බන්ධයෙන් ඊයේ (09) කොළඹ මහෙස්ත්‍රාත් අධිකරණයට කරුණු දැක්වූ පොලිසිය දැරියන් රැගෙන ගිය ජංගම දුරකථනයේ දත්ත ද විශ්ලේෂණය කිරීම ආරම්භ කරනු ලැබුවා. නමුත් එම දැරියන් තිදෙනා ඊයේ රාත්‍රි 10ට පමණ නැවත නිවසට පැමිණ තිබිණි.

මේ අතර, අද පෙරවරුවේ මේ දැරියන්ගෙන් ප්‍රකාශයක් ගැනීමට කෙසෙල්වත්ත පොලීසිය පියවර ගගනු ලැබුවා.

එහිදී කෙසෙල්වත් නිවසේ ජීවත් වූ 13 හැවිරිදි ෆාතිමා කදීරා , ඇයගේ වැඩිමල් සොයුරිය වූ 15 හැවිරිදි ෆාතිමා රක්ෂා මෙන්ම, ගම්පොළ සිට නිවසට පැමිණි ඥාති දියණිය වන 13 හැවිරිදි ෆාතිමා වර්යා ද ප්‍රකාශ ලබා දෙනු ලැබුවා.

තමන් කොරියානු සංගීතයට හා බටහිර නර්තනයට දැඩි ඇල්මක් දැක්වුවත් ඊට වැඩිහිටියන්ගෙන් විරෝධයක් එල්ල වූ බව ඔවුන් එහිදී සඳහන් කර තිබෙනවා. පසුව සංගීතය සහ නර්තනය ඉගෙනීම සඳහා නිවසින් පිටව යාමට තීරණය කළ බව ඔවුන් පොලිසියට ප්‍රකාශ කර තිබුණේ.

ඒ අනුව 8 වැනිදා පෙරවරුවේ ත්‍රිරෝද රථයකින් කොළඹ, පිටකොටුවට එන මොවුන් තමන්ට අවශ්‍ය මුදල් සොයාගෙන ඇත්තේ, රත්‍රං මුදුවක් රුපියල් 64,000කට අලෙවි කරමින්ය.

මුළු සිරුරම වැසෙන ඇඳුම් ඇඳීම වෙනුවට බටහිර පන්නයේ ඇඳුම් ඇඳීමට ආශාවක් දැක්වූ නිසා එම මුදලින් ඇඳුම් මිලදී ගෙන බටහිර සංගීත හා නර්තන පන්තියක් සොයාගැනීම සඳහා ඔවුන් පළමුව ගොස් තිබුණේ වත්තල ප්‍රදේශයටය.

පසුව ඔවුන් අනුරාධපුරය බලා පිටත්වගොස් තිබෙනවා.

එම දැරියන් සම්බන්ධයෙන් අවධානයෙන් සිටි ඔවුන් ගමන් කළ බස් රථයේ රියදුරෙකු මෙසේ කරුණු දක්වා තිබුණා.

“බස් එක කොළඹින් ගියේ 5.30ට. ළමයි කළු පාට ඇඳුම් ඇඳගෙන හිටියේ. අනුරාධපුරයට ටිකට් ගත්තා. අනුරාධපුරයට ගිහිල්ලා ආයේ කොළඹට යනවා කිව්වා. රෑ වුණා කොළඹ බස් එකකට අපිව දාන්න කිව්වා. රෑ 12.30 ට විතර මන්නාරමේ ඉඳලා එන බස් එකක් ආවා. මම ගිහින් නතර කරලා ළමයි 3 දෙනාව බස් එකට දාලා කොළඹින්ම බස්සන්න. වෙන කොහෙන්වත් බස්සන්න එපා කිව්වා. මෙයාලා කෙසෙල්වත්තෙ කියලා. පස්සේ මම බස් එකටත් කතා කළා. උදේ 7.30ට විතර කොළඹින් බැස්සා කිව්වා.”

කොළඹ පැමිණි ඔවුන් යළි මහනුවර බලා පිටත්ව ගොස් ඇත්තේ සුදුසු පන්තියක් සොයාගැනීම සඳහායි. එහිදීද පන්තියක් හමුනොවීම නිසා යළිත් කොළඹට පැමිණි ඔවුන් රාත්‍රියේ නවාතැන් ගැනීම සඳහා නවාතැන්පොළක් වෙත ගොස් තිබෙනවා.

ජාතික හැඳුනුම්පත් නොතිබීම හේතුවෙන් තමන්ව භාරගැනීම එහිදී ප්‍රතික්ෂේප වූ බවයි එම දැරියන් පොලිසියට පවසා ඇත්තේ.

තමන්ට නවාතැන් ගැනීමට ස්ථානයක් හමුනොවූ තැන ඔවුන් තිදෙනා රාත්‍රි 10ට පමණ යළි නිවසට පැමිණ තිබෙනවා.

මේ අතර, එම දැරියන් තිදෙනාව අද කොළඹ ප්‍රධාන මහෙස්ත්‍රාත් අධිකරණයට ඉදිරිපත් කළ අතර එහිදී අතිරේක මහෙස්ත්‍රාත් චන්දිම ලියනගේ මහතා නියෝග කළේ, ළමුන් බැඳුම්කරයන්ට යටත්ව දෙමව්පියන්ට භාරදෙන ලෙසයි.

එමෙන්ම දැරියන්ගේ භාරකාරීත්වය පිළිබඳව පරිවාස නිලධාරියෙකුගේ නිර්දේශ සහිත වාර්තාවක් ලබන 16 වනදා අධිකරණයට ඉදිරිපත්කරන ලෙසද මෙහිදී අතිරේක මහෙස්ත්‍රාත්වරයා කෙසෙල්වත්ත පොලිසියට නියෝග කර තිබෙනවා.

ඒ අනුව ඔවුන් ජීවත්වූ එම නිවෙස්වල ගැටලුකාරී තත්ත්වයක් පවතින්නේදැයි එහිදී නිරීක්ෂණය කිරීමට නියමිතයි.

 455 total views,  5 views today

What’s your Reaction?
+1
0
+1
0
+1
0
+1
0
+1
0
+1
0
+1
0

Leave a Reply