Trending වුණු ‘අන්සතු ඔබ’ ගැන තිසර සහ නිම්න කියපු කතාව!

තිසර වීරසිංහ: 

කොහොම ද මේ දවස්වල ජීවිතේ?

අන්සතු ඔබ වෙත ගීතය නිකුත් කළාට පසුව නොසිතු ලෙස මුහුණුපොත හරහා කතාබහට ලක් වුණා. අලුත් නිර්මාණ කිහිපයක සැලසුම් සකස් කරගෙන යමින් පවතිනවා.

මේ නිර්මාණය බිහිවුණේ කොහොම ද?

මේ ගීතයේ පද රචනාව රුෂාන් සිල්වාගේ. ඔහු මගේ පාසල් මිතුරකුගේ සහෝදරයෙක්. රුෂාන්ව මුණගැසුණාට පසුව ඔහුගේ පද රචනා සහිත පොතක් ඔහු මට පෙන්වූවා. ඒ අතරින් මගේ හිත ගත් පද පෙළ තමයි අන්සතු ගීතය විධියට නිර්මාණය වුණේ. මම තනුව නිර්මාණය කරලා ඩමි එකක් විධියට මේ ගීතය මගේ ළඟ තිබුණා. මේ ගීතයේ සංගීතය කළේ ළහිරු ද කොස්තා. කොවිඩ් නොමැති කාලයේ මම, නිම්න, නෙරුන් ආදී පිරිස ඉඳහිට මුණගැසිලා කලා කටයුතු ගැන සංවාද සාකච්ඡා කරනවා. මේ ගීතය නිර්මාණය කරලා, මියුසික් වීඩියෝව කරන්න අපි බලාගෙන සිටියත් කොවිඩ් හේතුවෙන් යම් ප්‍රමාදයක් සිදු වුණා. නමුත් මියුසික් වීඩියෝව අපි සැලසුම් කරලා තිබුණු විධියත් සමග මිනිසුන් සමග විශාල වශයෙන් සම්බන්ධ නොවී රූගත කිරීම් ආදිය සිදු කර ගත හැකි නිසා ම වගේ ම අපි මේ වැඩේ ගැන හොඳට ම සැලසුම් කරලා තිබුණු නිසා රට විවෘත කළ වහා ම අපිට මියුසික් වීඩියෝව කර ගන්න හැකි වුණා. මියුසික් වීඩියෝව අධ්‍යක්ෂණය කළේ නිම්න දෙව්පුර, කැමරාකරණය සහ සංස්කරණය කළේ නෙරුන් කල්පජිත් විසින්.

ගීතය සඳහා මෙවැනි ප්‍රතිචාරයක් ලැබෙයි කියලා හිතුවා ද?

මම මීට පෙර ත් ගීත දොළහක් පමණ කරලා තිබෙනවා. නමුත් මම බොහෝ පිරිසක් හඳුනන කෙනෙක් නොවෙයි මම හිතන්නේ. එම නිසා මේ නිර්මාණය කරන විට අපි සිතුවේ නිර්මාණාත්මකව ගීතයට උපරිම සාධාරණයක් කරන එක ගැන පමණයි. ෆේස්බුක් හරහා නොසිතූ ප්‍රතිචාරයක් ගීතය සඳහා ලැබුණා.

මේ ගීතය සඳහා ගොඩනැගුණු කතාබහ ගැන ඔබ සිතන්නේ කොහොම ද?

මෙහෙමයි. මේ ගීතය රුෂාන් ලියන්නේ ඔහුට සිතෙන සහ දැනෙන විධියට. මම තනුව නිර්මාණය කළේ මට දැනෙන විධියට. මියුසික් වීඩියෝව බිහි වුණේ නිම්නට සහ නෙරුන්ට දැනෙන විධියට. ඒ වගේ ප්‍රේක්ෂකයාට සහ රසිකයාට මේ ගීතය දැනෙන විධියට ඔවුන් මේක භාර ගන්න ඇති කියලා මම හිතනවා. නිර්මාණයකට මෙවැනි කතාබහක් ඇති වීම මම දකින්නේ හොඳ දෙයක් විධියට යි.

ඔබ ප්‍රේක්ෂකයන් අතරට යන්නේ මේ ගීතය තුළින් කියලා කිවුවොත් නිවැරැදි ද?

මුලින් ම මම ගීතයක් කළේ 2009 අවුරුද්දෙදි. මේ වන විට ගීත ‍දොළහක් පමණ කරලා තිබෙනවා. මට ප්‍රේක්ෂකයන් අතරට පැමිණීමට සෑහෙන කාලයක් ගත වුණා. මගේ ‘රත්තරනේ’ ගීතය ත් යම් තරමකට ප්‍රේක්ෂකයන් අතරට ගියා. ඒත් මාධ්‍ය තුළින් නම් ඒ ගීතය ඇහුණේ නැහැ. 2013 වසරේ හොඳ ම මියුසික් වීඩියෝවට හිමි සම්මානය මගේ සීතල නත්තලේ කියන මියුසික් වීඩියෝවට ලැබුණා. නමුත් මම හිතන්නේ මේ ‘අන්සතු ඔබ වෙත’ ගීතය තුළින් තමයි බොහෝ දෙනෙක් මාව හඳුනාගත්තේ.

ලැබුණු ප්‍රේක්ෂක ප්‍රසාදය ත් සමග ඉදිරි නිර්මාණ කටයුතු සම්බන්ධයෙන් සැලසුමක් තිබෙනවා ද?

මේ ගීතය සරල පද, සරල තනුවක්, මියුසික් වීඩියෝව ත් සරලයි. සරලත්වය එකතු වෙලා මේ ගීතය සහ මියුසික් වීඩියෝව සවිමත්ව නිර්මාණය වුණා. අපි නිර්මාණයට අවංකව කටයුතු කළා වගේ ම අපි හැමෝට ම එකිනෙකා ගැන හොඳ විශ්වාසයක් තිබුණා. මේ නිර්මාණය කරන විටදී අපි එළියෙන් ලැබෙන ප්‍රතිචාරය ගැන සිතුවේ නැහැ. ඉදිරියේදීත් නිර්මාණ කරන විට ඒ ගැන සිතලා නිර්මාණ කරන්න ගියොත් කරන වැඩේ සාර්ථකව කරන්න හැකි වෙයි ද කියලා සැකයක් තිබෙනවා.

ඉදිරි බලාපොරොත්තු මොනවා ද?

සාර්ථකව නිර්මාණ කටයුතු කරගෙන යන එක තමයි බලාපොරොත්තුව.

පවුලේ විස්තර?

මම විවාහක යි. මගේ බිරිය සහ දරුවන් දෙදෙනා සහ මගේ මව තමයි පවුලේ සිටින්නේ.

මේ මොහොතේ ස්තූතිවන්ත විය යුතු පිරිසක් සිටිනවා ද?

නම් ගම් වශයෙන් කියන්න බැහැ සෑහෙන පිරිසක් සිටිනවා. මගේ පවුලේ අය, මගේ යහළු මිත්‍රාදීන් ඇතුළුව නිර්මාණ කාර්යයන්හිදී මට මූල්‍යමය වශයෙන් වගේ ම වෙනත් ආකාරයෙන් උදව් උපකාර කළ සියලු දෙනාට ස්තූතිවන්ත වෙනවා.

නිම්න දෙව්පුර: 

කොහොම ද මේ දවස්වල වැඩ කටයුතු?

මම ඡායාරූපකරණයේ යෙදෙනවා. එම වැඩකටයුතු සහ සිනමා නිර්මාණයක් කරන්න බලාපොරොත්තුවෙන් සිටිනවා. එහි වැඩකටයුතු කරමින් සිටිනවා.

අන්සතු ඹබ වෙත මියුසික් වීඩියෝවට ලැබෙන ප්‍රතිචාර කොහොම ද?

හොඳ සහ නරක ප්‍රතිචාර ලැබෙනවා. ඒවා ආදරයෙන් භාර ගන්නවා. විවේචනය කරන්නේ ත්, හොඳ කියන්නෙ ත් ඔවුන්ට නිර්මාණය දැනිලා තිබෙන නිසා නේ. ඒ ගැන සතුටු යි. ඒ වගේ ම නිර්මාණ ක්ෂේත්‍රයේ සිටින පිරිසගෙන් හොඳ ප්‍රතිචාර ලැබුණා.

මේක කතාබහට ලක්වෙන්න බලාගෙන ම කරපු වැඩක් ද?

මෙහෙම යි, මම නිර්මාණයක් කරන විට ප්‍රේක්ෂකයාගේ පැත්තේ සිට නිර්මාණය දෙස බලනවා. ප්‍රේක්ෂකයන් ඇවිස්සෙයි කියන බලාපොරොත්තුවෙන් තමයි මම නිර්මාණයක් කරන්නේ. මම හිතන්නේ ඕනෑ ම නිර්මාණකරුවෙක් බලාපොරොත්තු වෙනවා තමන් කරන නිර්මාණය පත්තු වෙයි කියලා. මම කෙටි චිත්‍රපට ආදිය මීට පෙර ත් කරලා තිබෙනවා. නමුත් මියුසික් වීඩියෝවක් කරපු පළමු අවස්ථාව මේක. කරපු පළමු  වැඩේ ම මේ විධියට පත්තු වුණු එක ගැන සතුටු යි.

මේ මියුසික් වීඩියෝව නිර්මාණය වුණේ කොහොම ද?

විශ්වවිද්‍යාලයේ මගේ අවසන් වසර නිබන්ධනය සඳහා මම කළේ ත් Single take කියන එක. මම නිර්මාණයක් කරන විට මගේ අනන්‍යතාවක් ලෙස Single take එකක් භාවිත කරන්න උත්සහ කරනවා. කාලයක් තිස්සේ මගේ ඔළුවේ මේ සංකල්පය තිබුණා. මේ ගීතය මට ලැබුණට පස්සේ මගේ සංකල්පය මම මේකට භාවිත කළා. මොක ද මේ ගීතයට ඒක ඉතාමත් හොඳට ගැළපෙන නිසා.

අසම්මතය නිර්මාණයක් තුළට ගෙන ඒම නරක ආදර්ශයක් ද?

ඒ විධියට සිතුවොත් අපි කාටවත් නිර්මාණයක් බලන්න බැරි වෙයි. එහෙම නම් ක්‍රියාදාම චිත්‍රපට බැලුවොත් අපි මිනිස්සු මරන්න ඕනෑ. හැම නිර්මාණයක් ඇතුළෙ ම තිබෙන්නේ ගැටලුවක්. ගැටලුවක් තුළින් තමයි නිර්මාණයක් බිහි වෙන්නේ. නිර්මාණයක් කියන්නේ ජීවිතෙන් පෙත්තක්. අසම්මතය හොඳයි කියන එක නොවෙයි මගේ උත්සහය. අසම්මතයක් නොතිබුණා නම් සම්මතයක් තිබෙන්න විධියක් නැහැ. සංස්කෘතිය, සදාචාරය, සම්මතය කියන්නේ මිනිස්සු ගොඩ නගා ගත් දේවල්. සමාජය හදලා තිබෙන රාමු කඩාගෙන ගිය පිරිසක් තමයි නිර්මාණකරුවන් කියන්නේ. නිර්මාණයක් රස විඳින්න ඒ තුළ රැ‍ඳෙන්න මිනිස්සුන්ට භාවයක් ඕනෑ. නිර්මාණකරුවෙක් කතා කරන්නේ සමාජය තුළ තිබෙන පොදු දෙයක් ගැන. යම්කිසි නිර්මාණයක් සම්බන්ධයෙන් කෙනෙක් ඇවිස්සෙන්න පුළුවන්. ඒ කියන්නේ එයාට දරා ගන්න බැරි අවස්ථාවක්, ඒ අවස්ථාවේදී එයා හොඳට හෝ නරකට ප්‍රතිචාර දක්වන්න පුළුවන්.

කලාකරුවාගේ කාර්යය සමාජයට ආදර්ශ සැපයීම ද?

කලාකරුවා කලාකරුවෙක් විධියට මනුෂ්‍යයෙක් විධියට ආදර්ශවත් විය යුතු යි. නිර්මාණ තුළින් කළ යුත්තේ මිනිස්සු ඇත්ත කියලා සම්මත කරගෙන සිටින දේවල් ඔළුවලින් ගලවලා මොකක් ද ඇත්ත ජීවිතේ කියලා මිනිසුන්ගේ ඔළුවලට තේරුම් කර දීම. නිර්මාණයක් තුළින් ආදර්ශයක් බලාපොරොත්තු වෙනවා නම් ඒක ඉතා ම වැරැදි මතයක්. අපේ සංස්කෘතික හැසිරීම් ප්‍රශ්න කිරීම තමයි නිර්මාණයක් තුළින් කරන්නේ.

මෙහි සාමාන්‍යයෙන් මියුසික් වීඩියෝවක දැකිය නොහැකි ලෙස ඇඳුම් වර්ණ ආදිය තුළින් ඉතා සියුම් ආකාරයෙන් අර්ථ නිරූපණයන් ඉදිරිපත් කර තිබෙනවා…

ඔව්. හැම දේ ම හේතුවක් ඇතුව භාවිත කළ දේවල්. රෝස පැහැති සාරිය, කොළ පැහැති ෂර්ට් එක එකිනෙකට විරුද්ධ පාට දෙකක්, ඒ වගේ ම බොහෝ ම දෙනෙක් කතා වෙනවා ඇය අම්මා කෙනෙක් කියන එක. අපි සිතුවාට ත් වඩා හොඳට සංකේත ඉස්මතු වෙලා තිබෙනවා. මම රංගනය සඳහා උපකාරී වෙන්න ගොඩනගපු කතා ඉතිහාසයට වඩා හාත්පසින් ම වෙනස් කතාවක් නරඹපු අය ගොඩනගාගෙන තිබුණා. ඒක හරි ම රසවත් දෙයක්. මම කියපු පුංචි දේවල් ටිකක් ඇතුළේ ප්‍රේක්ෂකයන් ලොකු කතාන්දර ගොඩනගාගෙන තිබුණා. ඒක තමයි විය යුත්තේ.

මේ නිර්මාණය සඳහා දායක වූ රංගන ශිල්පිනිය සහ ශිල්පියා ගැනත් කතා කරමු:

ෂේවියර් කණිෂ්ක මම කාලෙක සිට හඳුනන කෙනෙක් සහ කාලෙක සිට වැඩ කරන්න බලාගෙන හිටපු කෙනෙක්. බොහෝ දෙනාට මේ නිර්මාණය දැනෙන්නේ නළුවා සහ නිළිය සාර්ථක නිසා. මිනිසුන්ට දැනෙන්න භාව ප්‍රකාශනය කරන්න දක්ෂ රංගන ශිල්පීන් විය යුතුයි. නිපුනි ගුණවර්ධනව මම හඳුනාගන්නේ කණිෂ්ක අයියා හරහා. ඇය ත් නිර්මාණයට උපරිම සාධාරණයක් කළා.

මේ නිර්මාණය සඳහා සම්බන්ධ වූ අනෙක් අය ගැන ත් මතක් කරමු..

නෙරුන් කල්පජිත්, නලින් ලුසේනා, කසුන් තිවංක, දිනුක ලක්ෂාන් ආදී බොහෝ දෙනෙක් සිටිනවා මේ මොහොතේ සිහිපත් කළ යුතු. ඔවුන් සියලු දෙනාට ම මම ස්තූතිවන්ත වෙනවා.

ඉදිරි වැඩ කටයුතු ගැන කතා කළොත්…

මට මියුසික් වීඩියෝ සඳහා බොහෝ ආරාධනා ලැබුණා. නමුත් මම නිර්මාණයක් කරන්න යම් කාලයක් ගන්නවා. මගේ සිනමා පටයේ වැඩ කටයුතු තිබෙනවා. ඒක ආදර කතාවක්. ටිකක් ලොකු වැඩක් නමුත් මූල්‍යමය ගැටලු කිහිපයක් තිබෙනවා.

www.mawbima.lk

 669 total views,  5 views today

What’s your Reaction?
+1
0
+1
0
+1
0
+1
0
+1
0
+1
0
+1
0

Leave a Reply