ඉන්දියාවෙදි වෙච්ච දේවල් ගැන පළමු වතාවට යොහානි කතා කරයි!

සංගීත ප්‍රසංග ද්විත්වයක් පැවැත්වීමට ඉන්දියාවට ගිය අපේ රටේ පුංචි මැණික යොහානි ද සිල්වා ගැන විටින් විට අපට අසන්නට ලැබෙන්නේ අමුතු ම ආකාරයේ කතා ය.

සමාජ ජාල වෙබ් අඩවි විටින් විට මේ ආරංචි බෙදා හරින්නේ ඇසින් දුටු, කනින් ඇසූ සත්‍ය ප්‍රවෘත්ති විදිහට ය. ඇතැම් ඒවා අදහාගත නොහැකි ඕපාදූප ය. ගොසිප් ය.

මේ අසත්‍ය කරුණු කාරණා නිසා ම යොහානි දිලෝකා ද සිල්වා නම් ලොවක් දිනූ පුංචි කලා ශිල්පිනිය ගැන අහන්නට ලැබෙන සත්‍ය ප්‍රවෘත්ති ගැන පවා දෙවරක් හිතන්නට තරම් පරිසරය සකස් වී ඇත. මේ තත්ත්වය සැබවින් ම අපේ රට ජාත්‍යන්තරයට ගෙන ගිය මේ පුංචි කෙල්ල වෙනුවෙන් කරන අවැඩකි. 

සමාජ ජාලා වෙබ් අඩවිවලින් අසත්‍ය හා වැඩකට නැති ඕපාදූප පතුරවන අතරේ යොහානි ඉන්දීය සංචාරයේදී තමත් මුහුණ දුන් සතුට දනවන සුබවාදී කරුණු කාරණා ගැන මාධ්‍ය ඉදිරියේ කතා කළා ය.

එහිදී විශේෂයෙන් ම ඇය ඉන්දීය ජනමාධ්‍ය ඔස්සේ අදහස් දක්වමින් තමාට සහ තම සංගීත කණ්ඩායමට ඉන්දීය රසික රසිකාවියන් ලබාදුන්  අපරිමිත පිළිගැනීම හා දිරිය ගැන තුති පුද කළා ය.

ඉන්දියාවේ තරුණ පරපුර පමණක් නොව ඇතැම් වැඩිහිටි පිරිස පවා ‘මැණිකේ මගේ හිතේ’ ගීතය ඔවුනට හැකි අයුරින් ගායනා කොට අන්තර්ජාලයට මුදාහැර තිබිණි. ඊට ජාති ආගම් භේදයක් නොතිබිණි. ඒ අනුව හින්දි, මලයාලම්, තෙලිඟු, බෙංගාලි පමණක් නොව දමිළ බස කතාකරන උදවිය පවා මේ ගීතය අපූරුවට ගායනා කොට තිබිණි. ඇතැම් දමිළ තරුණ තරුණියන් ‘මැණිකේ මගේ හිතේ’ ගීතයේ වචන අපූරුවට උච්චාරණය කරමින් ගායනා කළේ, එහි රැප් කොටස දමිළ භාෂාවට හරවා භාෂා දෙකට ම සාධාරණය ඉටු කරමින්ය. දමිළ ඩයස්පෝරාවේ යැයි කියා ගන්නා ඇතැමුන් යොහානිගේ පියා ගැන කියමින් වෙනත් ආකාරයේ නින්දිත වටපිටාවක් සකස් කරන්නට වෙර දරද්දී දමිළ ජනතාව මේ සාධාරණය ඉටුකිරීම මැනවින් කැපී පෙනිණි.

විශේෂයෙන් ම ඉන්දියාවට ගිය අවස්ථාවේදී ගුවන් තොටුපොළේ සිට හෝටලය දක්වාත් ඉන්පසුව පැවැති ප්‍රසංග වාර දෙකේදී ම ඉන්දියාවේ සිටින අපේ රටේ  සිංහල, දෙමළ හා මුස්ලිම් ජනතාව යොහානි ඇතුළු කණ්ඩායමට ලබාදුන් සහයෝගය ගැන ද යොහානි මධ්‍යයට අදහස් දක්වා තිබුණේ මේ ආකාරයට ය.

“ඉන්දියාවේ ඉන්න අපේ අය අපේ ප්‍රසංගය බලන්න පවා ඇවිත් හිටියේ හුඟාක් වේලපහින්. ඔවුන් ප්‍රසංගය බලන්න ඇවිත් ඇහුවේ ඔවුන්ගෙන් ඕන වෙන උදවු මොනවා ද කියලයි. ඇත්තට ම ඔවුන් අපට විවිධ ආකාරයේ උදවු කළා. ඒ අයට ස්තූති කළ යුතුයි.”

මෙහිදී යොහානි ඇතුළු කණ්ඩායම තවත් අපූරුතම අත්දැකීමකට මුහුණ දුන්නේ ය. ඒ අය නෑකම් කියන අපේ රටත් සමග තවමත් මැනවින් සබඳතා පවත්වන බොලිවුඩ් රිදීතිරය දිනා සිටින ජැක්ලින් ෆර්නැන්ඩිස් ය. ඇය මුලදි යොහානිට සුබපැතුම් එක්කළා පමණක් නොව ඇය බලන්නට පවා ආවා ය. ඒ හයිද්‍රාබාද්වලට ය.

“ඒක ඇත්තට ම මට ලොකු සතුටක් වුණා. ඉදිරියේදී එකට වැඩ කරමු කියලත් කිව්වා. දන්න දන්න අයට කියලා අපිට ලොකු සහයෝගයකුත් ලබා දුන්නා.” 

බොලිවුඩයේ සිටින අපේ නිළි ජැක්ලින් එතැනින් නැවතුණේ නැත. ඇය පසුව ප්‍රකාශ කර තිබුණේ ලංකාවේ සංචාරක ප්‍රවර්ධනයට යොහානිගේ දායකත්වය ලබා ගත යුතු බව ය.

ඒ කෙසේ වෙතත් දැන් රජයේ ආරංචි මාර්ගවල ද කියැවෙන්නේ ශ්‍රී ලංකාවේ සංචාරක කර්මාන්තයේ ප්‍රවර්ධනයට නුදුරේදී ම යොහානිගේ දායකත්වය ලබා ගන්නා බව ය. ඒ අනුව ඇය ඉදිරියේදී ඩුබායිහි පැවැත්වෙන වර්ල්ඩ් වර්ක්ස් ෆෝ 2020 ප්‍රදර්ශනයට සහභාගි වී ශ්‍රී ලංකා සංචාරක ගීතය ගායනා කිරීමට නියමිතය. 

යොහානිට මේ තරම් රසික ආකර්ෂණයක් දිනා ගැනීමට හැකි වුණේ ‘මැණිකේ මගේ හිතේ’ ගීතය ප්‍රති නිර්මාණය කර ගායනා කළ නිසා. ඒ ගීතය සතිශාන් රත්නායක කියන නව පරපුරේ ගායකයා ගැයුවේ මීට අවුරුද්දකට විතර කලින්.

මේ වෙද්දී පැරැණි ගීත කීපයක් ප්‍රති නිර්මාණය කොට ගායනා කර තිබූ යොහානිට නිරන්තරයෙන් ම අහන්න ලැබුණේ පැසසුම් නෙමෙයි. විවේචන. එසේත් නැත්නම් ‍දොස්.

“ඇත්තට ම ඒ හින්ද ම මම හිතා ගත්තා ආපහු කවර් සෝංග්ස් එහෙමත් නැත්නම් අනුන්ගේ ගීත ප්‍රති නිර්මාණය කොට ගායනා කරන්නේ නැහැ කියලා. ඒ නිසා ම මම මගේ ස්වයං නිර්මාණ කීපයක් කළා. ඒවා අන්තර්ජාලයට මුදාහැරියා. මෙහෙ ම ඉන්න කොට තමයි නැවත කවර් සෝංග්ස් කරන්න ඇරයුම් ලැබුණේ. ඒ අනුව තමයි ‘මැණිකේ මගේ හිතේ’ ගීතය ප්‍රති නිර්මාණය කොට ගැයුවේ.”

යොහානි ගැයූ එම ගීතය මාස කීපයකින් පසුව ලෝකයේ ම පිස්සුවක් බවට පත්වුණේ, අභිෂේක්-අයිශ්වර්යා යුවළගේ පුංචි දියණි ‘නවේලි’ එසේත් නැත්නම් හින්දි සිනමාවේ රජු අමිතාබ් බච්චන්ගේ ආදරණීය මිනිපිරිය කළ වීඩියෝ සිත්තම නිසාය. ඇය ඇයගේ දක්ෂතාව පෙන්වන්නට යූ ටියුබ් හි තිබූ මේ ගීතය තෝරාගෙන සීයා රඟන කාලියා චිත්‍රපටයේ ගීත ජවනිකාව ඊට ඇතුළත් කළා ය.

සංස්කරණය කළ මේ වීඩියෝව අබිතාබ් බච්චන් මුළු රාත්‍රිය පුරාම කීප අවස්ථාවක් නරඹා එතැනින් නතර වුණේ නැත. අගෝස්තු 15දා රාත්‍රියේ ඔහුගේ ෆේස්බුක් හි සියලු හිත මිතුරන් අතර බෙදාහැරියේ  සතුටුදායක සටහනක් ද තබමිනි.

මේ සටහන ගැන බලවත් අවධානය යොමු කළේ ඉන්දියාවේ ප්‍රමුඛ පෙළේ සමාගමක් වන T Series හි ප්‍රධානියා වූ ගුල්ෂාන් කුමාර් ය. ඔහු  දශක හතරකට පෙර ආරම්භ කළ මේ ආයතනය මගින් ඉන්දීය සංගීතයට හා චිත්‍රපට කර්මාන්තයට සුවිශාල සේවයක් කළ ආයතනයකි.

ගුල්ෂාන් කුමාර් මේ සටහන ගැන අවධානය යොමු කරමින් ඊට මැදිහත් වන්නේ ශ්‍රී ලංකාවේ යොහානි  දිලෝකා ද සිල්වා සම්බන්ධවත් සොයා බලමිනි.  අවසානයේදී ඔහු ‘මැණිකේ මගේ හිතේ’ ගීතයේ ප්‍රචාරක අයිතිය පවා ලබා ගන්නේ යොහානි ඇතුළු ඊට සම්බන්ධ වූ සියලුම ශිල්පීන්ට සාධාරණය ඉටු කරමිනි. එහි තවත් වැදගත් ම කරුණක් වන්නේ මෑතකදී ඉන්දියාවේ ප්‍රදර්ශනය ඇරඹූ ශිද්දත් (Shiddat) චිත්‍රපටයේ නිල ප්‍රචාරක ගීතයට පවා යොහානිගේ මියුරු හඬ මුසු කර ගනිමිනි. මෙය ශ්‍රී ලංකාවේ පුංචි ගායිකාවකට ලැබුණු මිල කළ නොහැකි මහඟු ධනයකි.

ශිද්දත් චිත්‍රපටයේ ගීතය ගැයීමත් සමග ‘මැණිකේ මගේ හිතේ’ පමණක් නොව එම ගීතයට ද අති විශාල ප්‍රචාරයක් ලබාදීමට ටී. සීරිස් ආයතනය කටයුතු කළේ ය. ඉන්දියාවේ ගීත දර්ශක තුළ යොහානිගේ හඬ සහ රුව පෙරට ම එන්නේ මේ අපූරු සිදුවීමත් සමග ය. ලොව පුරා සිටින ඉන්දියානුවන් පිස්සු වැටෙන්නේත්, යොහානි පසුපස පැමිණ ඇය ගැන සොයා බලන්නට පටන් ගන්නේත් මේ සිදුවීම් මාලාවත් සමග ය.

එක රැයකින් ජනප්‍රිය වූ යොහානි යූ ටියුබ් ඉතිහාසය තුළ පෙරළි කරන්නේත් මේ ඉන්දියානු මැදිහත්වීමත් සමග ය.

සාමාන්‍යයෙන් ඉන්දියාවේ T Series සමාගම ලොව පුරා සිටින රූපවාහිනී හා ගුවන් විදුලි නාළිකා සමග ගිවිසුම්වලට එළැඹී ඇත්තේ කලෙක සිට ය. ඒ අනුව ඔවුන් එළිදක්වන එසේත් නැත්නම් මැදිහත් වෙන ගීත එම නාළිකා තුළ විකාශය වීම නිරන්තරයෙන් ම සිදුවේ. එමෙන් ම ඔවුන් පවරා ගත් ගීත ලෝකය පුරා ජනප්‍රිය විය.

අද වෙද්දි යොහානි ගැයූ හින්දි ගීතය හා මැණිකේ ගීතයේ අයිතිය ලබාගෙන ඇති මේ සමාගම දැන් මුළු ලෝකයේ ම සිටින ඉන්දියානුවන්ට එම ගීත ඇසෙන්නට සලස්වමින් සිටියි. ඉන්දියානුවන්ට අමතරව වෙනත් ජාතිකයන් ද මේ ගීත අහන්නේ ඒ පසුබිම මත ය. ඒ අනුව ඉන්දියානුවන් වෙසෙන මැදපෙරදිග පමණක් නොව මුළු යුරෝපයේ සහ ආසියානු රටවල ජීවත්වන ඉන්දියානුවන් අමිතාබ් කළ එසේත් නැත්නම් තම බොලිවුඩ් සිනමාවේ රජු අගය කළ ගීතය නිරන්තරයෙන් ම අසන්නේ ය. අගය කරන්නේ ය.

එමෙන් ම මේ ගීතය ඉන්දියාවේ සමාගමක් විසින් බෙදාහරින නිසා යොහානි ද සිල්වාත් ඉන්දියානු ජාතික කෙල්ලක් ලෙසින් ඇතැමුන් නම් කර ඇත. ඒ කෙසේ වෙතත් දැන් දැන් ලෝකයේ වෙසෙන සංගීත රසකාමීන් අපේ යොහානි ගැන සොයා බලමින් හිඳියි.

“මට ඒ ගැන ඇත්තේ ලොකු සතුටක්. සමහර වෙලාවට මට පුදුම හිතෙනවා. අපේ සිංහල වචන මේ අය මෙහෙම හොඳට උච්චාරණය කරන්නේ කොහොම ද කියලා.”

කලෙකට ඉහත දී ඉන්දියාවේ ජනතාව හා ලෝකයේ ක්‍රිකට් උන්මාදයෙන් පෙළෙන උදවිය කතා කළේ සනත් ජයසූරිය ගැනය. ලසිත් මාලිංග ගැන ය.

“මේ ගීතය ‘මාලී සුකුමාලී’ කියන වචන තිබෙන හින්දා සමහරු හිතුවේ ලසිත් මාලිංගට කියන ගීතයක් කියලා. මොක ද බොහෝ අය සිංහල භාෂාව දන්නේ නැහැනේ.” යොහානි එසේ කියන්නේ හිනැහෙමිනි.

කෙසේ හෝ මේ වෙද්දී යොහානි ඉන්දියාවේ රසික ජනතාව අතරට ගොස් අවසන් ය. දැන් බොහෝ දෙනා බලා සිටින්නේ යොහානි ඉන්දියාවට ගොස් දායකත්වය ලබාදෙන ඊළඟ නිර්මාණය ගැන ය.

“මම ශිද්දත් චිත්‍රපටයේ නිල ගීතය ගායනා කළෙත් දවස් දෙකකින් හින්දි භාෂා උච්චාරණය පුරුදු වෙලා. ඇත්තට ම ඒක ලොකු අභියෝගයක්,” යොහානි පැසසුම් ලැබූ හින්දි ගීතය ගැන කිව්වෙත් එවැනි කතාවක්.

මේ විදිහට ඉන්දියාවට ගොස් ඉන්දියාවේ රසික ජනතාව අතර නමක් දිනාගත් යොහානි එහිදී පවත්වපු සංගීත ප්‍රසංග දෙක ගැන කීවේ මෙවැනි කතාවකි. මේ සටහන අවසන් කිරීමට පෙර ඒ ගැන පැවැසීම ඉතා සුදුසු ය. 

“ඇත්ත ම කිව්වොත් පළමු ප්‍රසංගය ආරම්භ කරන්න කලින් අපි හිටියේ විශාල සැකයකින්. මොක ද ප්‍රසංගය පවත්වන්න කතා කරද්දිත් ඔවුන් යෝජනා කළේ ඒ රටේ ඉන්න සංගීත කණ්ඩායමක් එක්ක මේ ප්‍රසංගය පවත්වමු කියලා. නමුත් මම මගේ සංගීත කණ්ඩායම එක්ක එහාට ගියා. ඒ වගේ ම වැඩිපුර ඉංග්‍රීසි ගීත ගායනා කරන්න කියලත් ඉල්ලීමක් කළා. ඒත් අපි කිව්වා අපි ආවේ ලංකාවෙන්. ඒ නිසා වැඩිපුර අපේ රටේ භාෂාවෙන් ගීත ගායනා කරන්න ඕනෑ කියලා.

කොහොම වුණත් අපි සින්දු කියන්න පටන් ගත්තා. ඒක කළේ ලොකු බියකින් හා සැකයකින්. ඒත් හිතාගන්න බැරි වුණා. අපට පුදුමාකාර විදිහේ ප්‍රතිචාරයක් ඉන්දියානු රසික රසිකාවියන්ගෙන් ලැබුණා.

ඒ විතරක් නෙමෙයි දැන් ලෝකය ම මැණිකේ මගේ හිතේ ගීතයට නටනවා. ගයනවා. සමහරු වාදනය කරනවා. ඒක ලොකු සතුටක්. අපේ භාෂාවට අපේ රටට ගෞරවයක්,” යොහානි කීවා ය.

යොහානි ගීතයෙන් එසේත් නැත්නම් සංගීතයෙන් එසේ රටට ගෞරවයක් ලබා දෙන අතරේ ඇයගේ පියා මේජර් ජෙනරල් ප්‍රසන්න ද සිල්වා මානුෂික යුද්ධයේදී ලබාදුන් සුවිශාල මැදිහත්වීම ගැනද ෆීල්ඩ් මාෂල් සරත් ෆොන්සේකා මහතා ෆෙස්බුක් සටහනක් තබමින් කියා තිබිණි.

‘මාවිල්ආරු’ වසා දමමින් එහි වෙසෙන සාමාන්‍ය ජනතාවට ජලය ලබාදීම  නවතා දමා තිබූ මොහොතේ සිට එම මානුෂික යුද්ධය නිම වී රටට සාමය ඇතිකරන තුරු ම තම ජීවිතය ගැන නොසිතා සටන් බිම ජයග්‍රාහී ලෙස මෙහෙය වූ මේ යුද්ධ සෙනෙවියා ගැනත් මහත් අභිමානයක් ඇති බව ඔහු එහිදී කියා සිටිමින් යොහානි දියණියටත් කලාවෙන් රටට ජයග්‍රහණයක් ලබාදීමට හැකියාව ලැබේවායි ශුභාශිංසනය කර තිබුණේ ය.

මේ සියලු සුබ පැතුම් මැද යොහානිට රට වෙනුවෙන් තවත් බොහෝ දේ කරන්නට හැකියාව ලැබෙනු ඇත.

උපුටා ගැනීම : WWW.MAWBIMA.LK / සමන් ප්‍රියංකර නම්මුනිගේ

 617 total views,  5 views today

What’s your Reaction?
+1
0
+1
0
+1
0
+1
0
+1
0
+1
0
+1
0

Leave a Reply