ටැක්ස් මාෆියාවට අහුවුණු බොලිවුඩ් සුපිරි තරු…

ඉන්කම් ටැක්ස් ප්‍රශ්න යනු සුපිරි බොලිවුඩ් තරුවලට අලුත් දේවල් නොවේය. සෑම වසර කිහිපයක් පාසාම වාගේ සුපිරි තාරකාවන් සේම තාරකාවියන්ද ටැක්ස් දැලේ පැටලී කරණම් ගැසීම සහ කට්ටි පැනීම නිතර සිදුවන්නකි. එක්දහස් නවසිය හැට ගණන්වල සිට අද දක්වාම රාජ් කපූර්ගේ සිට රන්බීර් කපූර් දක්වාත්, අමිතාබ්ගේ සිට ෂාරුක් සහ වරුන් දවාන් දක්වාත් එය එකම කලාවට සිදුවේ.

සුපිරි මට්ටමේ නිළියන් ගත්තද එය එහෙමය. හේමා මාලිනියගේ සිටම අද ටැප්සි පන්නු දක්වාම එය සිදුවෙමින් පවතී.

ටැප්සි පන්නු,
දෙවියනේ… නම හදාගෙන හරිබරි ගැහෙන්නත් කලින් ටැප්සි කෙල්ල පස්සෙන් ටැක්ස් කාක්කෝ වට වෙන්න අරගෙනද?
ඉඩක් හදාගෙන තවම හරිබරි ගැහුණෙ නැතුවට නම් ටැප්සිගේ ආදායම සුළුවට ගන්නට බැරිය. කෝටි 08ක් සඳහා තම ලන්සුව තබන්නේ යැයි මාධ්‍යයට කීවාට ටැප්සි දැන් කෝටි 10කට වඩා චිත්‍රපටයකට අය කරන බව ටැක්ස් මාෆියාව ෆිල්ම් ෆෙයාර් සමග වහසි බස් දොඩා ඇති බව කියැවේ.

ටැක්ස් මාෆියාව දැන් ලුහුබඳින්නට පටන් ගෙන ඇත්තේ නවක තරු පසුපසද?
අපොයි නැහැ… පසුගිය සතියේ ප්‍රවීණ තෝරු මෝරු ගණයේ තරුද උතුරු ඉන්දීය සිනමා සාගරය තුළින් ටැක්ස්කාරයන්ගේ බිලී කොක්කට මාට්ටු විය. ඒ අතර සංජේ දත්, ප්‍රියංකා චොප්රා, කැට්රිනා කයිෆ් සමග ප්‍රසිද්ධ නළුවකු වූ සෝනු සුද්ද ටැප්සි පන්නු සමග පෙළගැසී සිටියහ.

සමීක්ෂණය සිදුවූයේ දිල්ලි නුවර ඒ.ඒ.පී. රජයෙහි උපදේශකත්වය හරහාය. සෝනු සුද්ගේ වත්කම් මාර්ග හයක් එතැනදී විභාග කෙරිණි. තද නීතිමය තත්ත්වයක් යටතේ සුද්ට නඩු වැටෙන්නට තිබුණද දිල්ලි මහ ඇමැති අරවින්ද් කේජ්රිවාල්ගේ මිතුරු මැදිහත් වීම මත දඩ සහ නඩු අහෝසි විය.

ඒ කියන්නේ මහ ඇමැති කේජ්රිවාල්ගේ වේට්ටියේ සාක්කු දෙකට බර ගානක පගාවක් වැටුණු බවද?
සහතික වශයෙන්ම බී ටවුන් නළුවකු ලෙස හැඳින්වෙන සෝනු සුද්ගේ ආදායම් මාර්ග ඉලක්කමෙන් හයක් වේ නම්, මුදල් නෝට්ටු හරහා කීයක් වෙයිද?

එතකොට සංජේ දත්ට පිහිට වෙන්න පැමිණි ඇමැතියා කවුද?
සංජේ ඇවිත් අළුගෝසු පන්නයේ පුද්ගලයකු වුවද ඉන්කම් ටැක්ස් එකේ දඩ මුදලින් තමා බේරන්නැයි කිසිවකුට කීවේ නැත. හැබැයි සංජේ දැඩි සේ සන්තාපයට පත්ව සිය ට්විටර් ගිණුමට තම කනගාටුව මෙසේ ප්‍රකාශ කර තිබිණි.

‘මගේ වියදම් අධික වීම ගැන කිසිවකු තැවිය යුතුද…? සංජේ වියදම් අඩු කරන්න යැයි මගේ බිරිය මනායා හෝ සොහොයුරිය නම්රාතා කීවේ නම් දුකක් නැත. මා වියදම් කරන තාලය ගැන රජයට හෝ ටැක්ස් වදකයන්ට ප්‍රශ්නයක් වීම විහිළුවකි. කුමක්ද මේ වැටලීමෙහි තේරුම…? සත්තකින්ම මෙය තද විහිළුවක් බව නොකියාම බැරිය….’

සංජේ එලෙස සටහන් කොට තිබූ කනගාටුදායක පණිවුඩය වෙනුවෙන් ඔහුට ළැදි රසිකයන් තම ශෝකය දස දහස් ගණනින් ප්‍රකාශ කර තිබිණි.

ප්‍රියංකා චොප්රාට ටැක්ස් නඩුව ගොනුව තිබුණේ ඇගේ බැංකු ගිණුම් පරීක්ෂා කිරීමෙන් අනතුරුවය. 2011 සිටම ප්‍රියංකා පසුපස ටැක්ස් විමර්ශකයන් ලුහුබැඳීම ආරම්භව තිබිණි. ප්‍රියංකාගේ පියා ආචාර්ය අශෝක් චොප්රාගෙන් ප්‍රියංකාට ලැබුණු කෝටි ගණනක මුදල් සම්භාරය එදා සිටම ඊට හේතුව තිබිණි.

‘අවංකව කියන්නේ නම්, ටැක්ස් විමර්ශකයන්ට අවශ්‍ය වී ඇත්තේ නීතියක් ඉටුකරලීමට වඩා සැපට ජීවත් වන සුපිරි මිනිසුන්ගෙන් අල්ලසක් ගැනීමේ මේනියාවය…’
ප්‍රියංකා චොප්රා ඉතා ප්‍රසිද්ධියේ තම හිතේ අමාරුව එසේ ප්‍රකාශ කළාය.

සුරූපී නිළි කැට්රිනා කිසිවකුට වදයක් නැති අහිංසක චරිතයක් වුවද ඇගේ නිවෙසේ ගණන් කර නිම කිරීමට බැරි තරම් කළු සල්ලි සූට්කේස් තිබී හසුව ඇති බව ටැක්ස් විමර්ශකයන් පොලිසියට සහ බදු දෙපාර්තමේන්තුවට දන්වා තිබිණි.

නවක නිළියක ලෙස කඩිනමින් ප්‍රසිද්ධියට පත්වූ ලස්සන කෙල්ල ටැප්සිට මුම්බායි සහ පූනාවල ස්ථාන 20ක පමණ දේපළ තිබෙන බව ටැක්ස්කාරයන් ඉතා සූක්ෂ්ම ලෙස සොයාගෙන තිබිණි.

එතකොට දඩයෙන් බේරුණේ සෝනු සුද් විතරද?
ඔව්… එය එහෙම සිදුවූ බව කියැවේ. එයට හේතුව ලෙස සුපිරි තරු දක්වා ඇත්තේ දඩයෙන් ගැලවීමට දේශපාලකයකුගේ සහාය පතන්නට වඩා දඩය ගෙවීම දාහෙන් සම්පතක් කියාය.

-දමයන්ති රේණුකා ප්‍රනාන්දු / www.mawratanews.lk

 755 total views,  10 views today

What’s your Reaction?
+1
0
+1
0
+1
0
+1
0
+1
0
+1
0
+1
0

Leave a Reply