අමෙරිකන් සමාගමේ ගෑස්වලින් වසර 5කදී කෝටි 4,000කට අධික ලාබයක්!

යුගදනවි හා කැලණිතිස්ස බලාගාර දෙකට අමෙරිකන් සමාගමෙන් ගෑස් ලබා ගැනීමෙන් වසර පහකදී රටට ලැබෙන ලාබය රුපියල් කෝටි 4,000කට අධික යැයි විදුලිබල මණ්ඩල පාලනාධිකාරිය ගණන් බලා තිබේ.

මෙම සමාගම මෙරටට පැමිණියේ ස්වාභාවික ද්‍රව වායු(එල්.එන්.ජී) විදුලි බලාගාරයක් ඉදි කිරීමේ අරමුණින් යැයිද එම සමාගම සතුව ගෑස් සහ ස්වභාවික ද්‍රව වායු මෙන්ම නෞකා පහසුකම් ඇතුළු සුදුසුකම් රැසක් සහිත එකකැයිද පාලනාධිකාරිය කියා සිටී.

යුගදනවි බලාගාරයට හා කැලණිතිස්ස බලාගාරයට අවශ්‍ය එල්.එන්.ජී ගෙන ඒම සඳහා යටිතල පහසුකම් ලබාගැනීම සඳහා ලංකා විදුලිබල මණ්ඩලය ජාත්‍යන්තර ටෙන්ඩරයක් කැඳවා ඇතැයිද ඒ අනුව නෝර්වේ,ඉන්දියාව සහ පාකිස්තාන රටවලින් මිල ගණන් ඉදිරිපත් කර ඇතැයිද විදුලිබල මණ්ඩලය කියා සිටී. අමෙරිකන් සමාගම යුගදනවි විදුලි බලාගාරයේ සියයට හතලිහක කොටස් ලබාගැනීමෙන් හෝ ගෑස් හා එල්.එන්.ජී සැපයීම නිසා එකී ටෙන්ඩරය නතර නොවන බවත් අනාගතයේ මෙරට ඉදිකිරීමට නියමිත එල්.එන්.ජී විදුලි බලාගාර සඳහා යටිතල පහසුකම් ඇතිකිරීම සඳහා අඩුම මිල ගණන් හා අදාළ සුදුසුකම් සපුරන සමාගමට එම ටෙන්ඩරය පිරිනමන බවද පාලනාධිකාරිය කියා සිටී.

යුගදනවි බලාගාරය ඉදිකළේ විවිධ රටවල්වලින් ලබාගත් ණය වලිනි. ඒ අනුව ඊට වැය කළ මුදල්වලින් සියයට හැත්තෑවක්ම ණය මුදල් බවත් ඉතිරි සියයට තිහක මුදල විවිධ පාර්ශ්වවල කොටස් මුදල් යැයි ද ලංවිම සඳහන් කර සිටී.

තවත් වසර දාහතරකට පසු යුගදනවි විදුලි බලාගාරයේ අයිතිය සම්පූර්ණයෙන්ම විදුලිබල මණ්ඩලයට හිමිවන බැවින් ඉදිරි වසර දාහතරක කාලයකට අමෙරිකන් සමාගමට බලාගාරයේ සියයට හතලිහක කොටස් ප්‍රමාණයක් ලබාදීමෙන් රටට කිසිදු පාඩුවක් නොවන බවද පාලනාධිකාරියේ ස්ථාවරය වී තිබේ. මෙම බලාගාරය දැනට ඉන්ධන මගින් විදුලිය ජනනය කරන අතර අදාළ අමෙරිකන් සමාගම එකඟ වී තිබෙන ආකාරයට එල්.එන්.ජී මෙරටට ගෙනැවිත් විදුලි බලාගාරයෙන් විදුලිය ජනනය කිරීමේදී දැනට රුපියල් තිහක් පමණ වන එම බලාගාරයේ විදුලි ඒකකයක මිල රුපියල් දාහතකට පමණ අඩුවන බවද ගණන් බැලීමේදී තහවුරු වී තිබේ.

ශිරාන් රණසිංහ

 664 total views,  10 views today

What’s your Reaction?
+1
0
+1
0
+1
0
+1
0
+1
0
+1
0
+1
0

Leave a Reply